وجه المهندس محمد عجيزة عضو مجلس إدارة الاتحاد المصري للتايكوندو ورئيس بعثة المنتخب المشاركة في بطولة العالم المقامة بمدينة ووشي الصينية، رسالة مؤثرة إلى البطل الأولمبي سيف عيسى، عقب تتويجه بالميدالية الذهبية التاريخية لوزن تحت 87 كجم.

سيف عيسى لاعب التايكوندو 

ونشر عجيزة عبر صفحته الرسمية على موقع التواصل الاجتماعي فيس بوك منشورًا قال فيه: "الصورة فوق كل الناس شافوها وفرحوا بيها، أما الصورة اللى تحت محدش شافها ولا حتى انت، صورتها ليلة خسارتك فى الأولمبياد فى مطعم القرية الأولمبية، عشان كنت شايف إن اللى ربنا قدره يومها أكيد له حكمة فيه، ويشاء السميع العليم إنه يعوضك بعدها بسنة واحدة بإنجاز محصلش فى العصر الحديث للتايكوندو، وتبقى من 3 مصريين عظماء بس اللى حققوا الإنجاز ده فى التاريخ".

وأضاف رئيس البعثة في رسالته: "اللى معانا هنا عارف إن كل الفرقة، على مختلف مستوياتهم، كان نفسهم فى ميدالية النهاردة، عشان عايزين ربنا يراضيك ويعوضك خير، لأنها لو بحسابات البشر يبقى كان مكانها باريس، لكن ربنا أقداره أجمل واختياره هو الأفضل، وبإذن الله مكانك على البوديوم فى لوس أنجلوس".

واختتم عجيزة قائلًا: "كدة خلصنا يا سيف بالنسبالك، ونشوف باقى الأبطال اللى وراهم معارك عنيفة فى واحدة من أقوى بطولات العالم، وبإذن الله الخير لسه جاى والله المستعان... للمكسب ألف أب، وللخسارة أب وحيد... الحمد لله".

وحقق البطل الأولمبي سيف عيسى إنجازًا تاريخيًا للتايكوندو المصري، بعدما توج بالميدالية الذهبية في بطولة العالم لوزن تحت 87 كجم، التي تستضيفها مدينة ووشي الصينية خلال الفترة من 24 حتى 30 أكتوبر الجاري.

ويعد هذا التتويج هو الأول من نوعه منذ عام 1997، ليعيد سيف عيسى المجد للتايكوندو المصري على الساحة العالمية، ويؤكد استمرار تألق الأبطال المصريين في مختلف المحافل الدولية.