قال الرئيس السيسي "أي حاجة في الدول عايزها تنجح اطمن على الاستقرار كأساس للانطلاق ولو شوفنا تجارب الدول في موضوع السياحة هنجد أن في جزء كبير منه بيعتمد على الاستقرار والأمن".

وأضاف الرئيس السيسي، في كلمته خلال اختبارات كشف الهيئة للطلبة والطالبات المُتقدمين للالتحاق بأكاديمية الشرطة، نقلتها "إكسترا نيوز": "الدولة اللي بتقدر توفر لسنوات طويلة حالة من الاستقرار بصفة عامة، فده يبقى عندها فرصة لو عايزة تعمل سياحة إنها تنجح، فأساس الموضوع في السياحة كتنمية وازدهار ومستهدفات ممكن تحققها".

وتابع "لازم تبقى مطمن دايمًا على أن موضوع الأمن والاستقرار عندك بيصنف تنصيف كبير وحتى الدول الكبيرة عاملة تصنيفات للدول وحالة الاستقرار والأمن اللي فيها وبيطلعوا دايمًا نشرات ويقولوا الدولة دي نحطها في الشريحة البيضا أو الحمرا أو الخضرا أو غيره والنشرة دي بيطلعها لمواطنيه وللسياح ودي بيبقى ليها تأثير على حركة السياحة، لأن العالم كله بيشوف النشرات دي على أنها معيار ومؤشر لحالة الأمن والاستقرار في الدول".

وواصل: "ساعتها لما تلاقي في استقرار هتقدر تعمل مدارس سياحية كويسة وتعمل تنمية سياحية كويسة وترويج كويس، لأن المعادلة ماشية والمسار ناجح، لكن لو المسار تعرض لعدة ضربات بتبقى ثقافة التنمية -أنا بتكلم على قطاع السياحة بس- هتبص تلاقيها تنكمش أو تتوقف، فالمتحف المصري هو محطة صغيرة في موضوع السياحة، ومصر بالإمكانيات اللي فيها المفروض يكون عندها 60 أو 70 مليون سائح، وإحنا لو قدرنا نحافظ على استقرارنا وأمننا وبوعدك إن العدد اللي موجود دلوقتي هنحاول نخليه من 13 أو 14 مليون  نخليه 28 مليون".