سارة وفيق ترد على انتقادات طارق الشناوي لفيلم "ريستارت": فرق كبير بين الإهانة والنقد

هاجمت المخرجة سارة وفيق، الناقد الفني طارق الشناوي بعد انتقاده لفيلمها السينمائي الجديد "ريستارت" بطولة تامر حسني، والمعروض حاليًا بدور السينما وجاء ذلك بعد تعليق الشناوي على الفيلم بأنه يفتقر إلى موضوع واضح، وهو ما دفع المخرجة للرد بشكل مفصل على وجهة نظره.

وكتبت المخرجة سارة وفيق عبر حسابها الشخصي بموقع التواصل الاجتماعي “فيس بوك” منشورا مطولا وقالت: "أستاذ طارق الشناوي في فرق كبير بين الإهانة وبين النقد. حضرتك بتقول إن مفيش موضوع في الفيلم ودي حاجة ضحكتني جدًا، لأن إحنا بنتكلم عن موضوع الساعة، موضوع العصر، أكبر موضوع بيهمنا ويخصنا حاليًا".

وتابعت: “كلامك فكرني بمشهد في الفيلم للنجم محمد ثروت وهو بيقول 'أنا أعمل أي حاجة عشان أبقى تريند' (إحنا خدامين التريند)، وسمع كلام الجوكر (الفنان باسم سمرة) اللي بيشتغل لأغراض ناس... مبروك يا أستاذ طارق عرفت تبقى تريند من غير ما تنقد الفيلم، تخبط في القائمين على العمل بعيد عن العمل نفسه، ولا اتكلمت عن إيجابياته ولا سلبياته”.

وأضافت المخرجة: “لا ههاجم أشخاص وبكده هطلع تريند بسرعة، ده موضوع الفيلم اللي أنت ما فهمتوش أصلًا ولا هو جالك على الجرح؟؟ وعلى فكرة أنا كمان بعرف أعمل تريند وهنطلع تريند أنا وأنت، بس أنا على حق وهمنشنك عشان تظهر بسرعة”.

كما ردت على تعليق الناقد حول أغنية الفيلم، قائلة: “أنت بتقول إن أغنية المقص عجبتك بس هي مش داخل الفيلم؟ لا يا أستاذ طارق، الأغنية في الفيلم، بس شكل اللي بيملي اتلخبط. ادخل شوف الفيلم اللي أنت ما شفتهوش واحكم عليه بنفسك، وبلاش الأفكار السطحية اللي بتقولها على كل الأفلام، لأنك لو شفت 'ريستارت' فعلًا كنت هتعرف إن قصته أهم ما فيه”.

وعن النقد الفني، قالت: “وبعدين حضرتك بتتكلم عن أدوات المخرج والمؤلف ولم تستخدم أدواتك كناقد فني، ياريتك قولت حاجة نستفيد بيها بدل ما تطلع ترمي إفيهات وإفيهات وحشة كمان”.

وختمت حديثها بالتأكيد على نجاح الفيلم في شباك التذاكر: “الرقم اللي متحقق جوه مصر وبره مش مجاملة يا أستاذ طارق، ده الجمهور الحقيقي اللي بنخاطبه، دول مش ولاد أختي مثلًا. الفيلم لسه نازل وداخل على خمسين مليون داخل مصر فقط، ودا نجاح مفرح لكل صناعة السينما، الحمد لله. على العموم دي كلمتك ورأيك، والجمهور قال كلمته برضو”.

فيلم ريستارت

"ريستارت" من بطولة تامر حسني، ويشاركه كل من: هنا الزاهد، محمد ثروت، باسم سمرة، عصام السقا، ميمي جمال، أحمد عزيز، وأحمد علي، كما يضم الفيلم عددًا من ضيوف الشرف، أبرزهم: إلهام شاهين، محمد رجب، شيماء سيف، رانيا منصور، توانا الجوهري، بالإضافة إلى ظهور خاص للنجم الرياضي السابق أحمد حسام ميدو.

الفيلم من تأليف أيمن بهجت قمر، وإخراج سارة وفيق، وينافس في موسم عيد الأضحى بجانب فيلميِّ "المشروع إكس" و"سيكو سيكو".