قالت الدكتورة مريم الشافعي، الخبيرة التربوية، إن كثير من الآباء والأمهات يقعوا في خطأ كبير دون أن يشعروا، وهو التركيز على التصرفات الخطأ فقط لأطفالهم، دون أن يسلطون الضوء على الجوانب الإيجابية بداخلهم، منوهة بأن مقارنة الطفل المراهق بغيره أمر كارثي يدمر ثقته بنفسه.
وأضافت الشافعي، خلال تصريحاتها ببرنامج "البيت" المذاع على قناة الناس: "إحنا بنبروز دايمًا المشاكل: صوتك عالي، طريقتك مش عاجباني، ليه أوضتك مش مترتبة، فالعيل يسمع طول الوقت 'أنا كده كده وحش' فيقرر: طب خلاص، أهو أنا وحش بقى فعلًا، وهعيش على كده، وأغلب أولادنا بيردوا علينا بسلوك سلبي لأنهم جواهم حالة خناق حقيقية".
ضرورة الرجوع للتربية بالرحمة والتشجيع
وأكدت الخبيرة التربوية، أن المشكلة بتبدأ تكبر لما يرجع المراهق البيت يلاقي انتقاد تاني، فيقفل على نفسه الأوضة والتليفون، وساعتها بتتكون فجوة كبيرة بينه وبين أهله، ممكن توصل لعدم الكلام لأيام من غير ما حد يفهم السبب الحقيقي.
وشددت الخبيرة التربوية، على ضرورة الرجوع للتربية بالرحمة والتشجيع، قائلة: "المنهج النبوي علمنا إزاي نربي أولادنا من غير صدام، لما شاب راح للنبي ﷺ وقاله: ائذن لي بالزنا، النبي ما عنفوش، ولا زعق فيه حطّه جوه التجربة، وسأله: أترضاه لأمك؟ لأختك؟ ولما الشاب حس الموقف، اتراجع فورًا".
وتابعت: "إحنا محتاجين نربّي أولادنا على نقاط قوتهم، نعلّي صوت الضمير جواهم، ونرجع للتواصل الحقيقي اللي فيه حب واحتواء، بدل ما نخسرهم وسط زحمة الحياة والمقارنات اللي بتحاصرهم".
