يستعد بيت الشعر العربي، بإدارة الشاعر سامح محجوب، لإطلاق الدورة الثانية من "ملتقى بيت الشعر العربى للنص الجديد"، وذلك خلال يومى 2 و3 مايو، فى إطار استكمال التجربة التى حققت حضورًا لافتًا فى المشهد الثقافى خلال دورتها الأولى.

صاحب الأغنيات  لـ محمود البنا

يا ألف مرحب..
يا لسان الحق ..
يا بحر ،
تحت الشمس،
غرب و شرق
يا عود قرنفل يدِّي طعم الفرق
" شعاع من الفجر شَق ..
يكافئ الـ سهرانين"
دراع ..
رد باب الخلق ..
ع الطيبين
في غيري قالك :
شعاع من الفجر شَقْ..!
يا تستحق و أحق..
الأمل..
و الحنين !

كلنا طير و طار،
بعضنا مُستَطَار، 
كلنا عائدين..

و يا ألف مرحب ،
كان لنا جُلنار..
من اليَاسَمِين

و نبع و جيتار،
و شارع نهار، 
و شمس و سنين..

بقى لنا انتظار
و بحر و فنار
و مالك حزين

بقي لنا انتظار ..
لصوت الجيتار..
ولمديح الحصار..
و للطيبين !

و يا ألف مرحب..
في الطلل ،
       و الدار ..

من كتر شوقي ؛
سبقت عمري  للجبل و الغار
سبقت موج الدنيا للجيتار ..
ظني
و إحساسي
           رحى دوار

ياناي..
ماكان لي صبر ع الأسرار ..

يا ناي..
و مين صِدِّيق،
        و مين غَوَّار ؟
 

شبكت بين الشك و الاحساس،

شبكت بين :
الأولة للناس ..
والتآنية للخلق
والتآلتة للناس ..
والرآبعة..
     للفرق !!

شعاع من الفجر شَقْ..
الندى
و النهار

شعاع من العمر شَقْ..
المدى و الفنار

شبكت بين
الشك و الاحساس

في فعل فاضح في حياة الناس..
ساوى "أيوة" بـــ " لأ "

في فرق واضح،
فرق رعد و برق

مايبانش واضح إلا في الاحداث
لو معركة دارت مابين الناس..
خِلْقة و خَلْق ..

و صار الـ صار

من بعضه دَق اليَدْ بالمسمار ..
وده احتمى فى الغار !
و ده احتمى في الشق!

و ده اللى خلَّى "الحق"
يخلق نار،
و يبني جنة و دار،
              و يحرق ... حَرْق !
 

يـــا ألف مرحب..
يا نَدِيّ الكاس ،
يا ميزان الماس ..
    : بعضنا طيبين

إرمي عصاك..
تلقف عِصِي الناس
من سراب الماس،
تراب الحنين

في الشارع الجُحْر، الحياةْ الشق..
إتلفتت لي..
زمرة التعابين

اتلفتت لي ..
بعد كون و سنين من الذكريات
ما بين
فتى مسكين ،
و حامل رايات

مشيت مع الأغنيات،
ورا الأمْنِيَات .. في السنين

مع الأغنيات..
في ضجر

ورا الأمنيات..
في حنين ..

وِصِلْت  بالسابحات في البحور.. الشجر
و وِصْلت الماشيات في الحياة .. البشر

رجِعْت
و رجعنا  ..
     حزانى و حزين

نخاف..
من الكلمة اللى تأبىْ تلين

نخاف..
م الحنين
من اللاهبات ..
الوتر و السنين

تأكدت مرة ان العيون ذاهبين ،
اللى باقي القدر
و ألف مرة ان الحنين للحنين ،
مُغرمين..
      مختبر

تأكدت..
مهما استوت لي الحياةْ،
مرغمين،
       مُنحدر !
لذا ما انتصرتش لشئ

كان لي في بعض من هولاء البشر .. ظن
ظني انتصر
لذا ما انكسرتش لشئ .. معتبر
كان لي في بعضهم في المرايا .. وطن
اتنفيت م الوطن،
    اتلهيت في الزمن 
       و اختفيت م الصور 

ثمَّ شكيت فى الكلام،
و السلام
والخطى في زحام..
و النظر !

مُجريات،
مُجريات،
مُجريات..

زي خيل عاديات ..
في ساعات المطر !

ما الوطن فيها إلا المكان،

ما الصديق ..
إلا بعض الأمان

ما الكلام ..
غير خيول الرهان ..
في كتاب العبر

تقول كلمة الحق:
مدهآمتان !

يرى الفارسان أي صوت..
إلا صوت العمار

وبين..
إنْ تدور الليالي، و بين الانتظار..
تدور الليالي ...
   مصير 
       و اختيار

أنا اخترت ..
صب الكلام في مصبُه ..
و قلت الحبيب ..
لا يضل اللى حبه
و ابني هيكبر .. 
اللي في قلبه ..
            قلبه،
واللى في الصوت رخام 

مش محيَّر مراكبه
مش مطيَّر حمام

صورة من صوتي لكن ..      
لا يدير الكلام :

المواجد حصار ؟
و الاغاني خيام

و  الموالد خضار ،
مش "جزيرة غمام"

كل شئ بالوداد ..
نور بيكتر،
كل نور
- و احنا أكتر .. -
فنار..
    يا يمام
 
و لـلآن ..
ما انتصرتش لشئ ،
ما اتحدتش بشئ في الزحام

باجري في الذكريات،
بالألم و النايات ..
               كل عام

اللي في قلبي ظني
و اللي في العين سُكات

سيل..
من الذكريات،
من المجريات

اللى باعرف أقوله ..
باقوله

واللى ماعرفش
باسمع طبوله،
من طيور النايات 
 

و يا ألف مرحب ..
صاحب الأغنيات .. 

طِبت فى كل حين

أنا عرفت إن السُكات ..
أصله قرآن مبين

والكلام يوم سكوت النبات ..
كان من الممترين

فهل أمشي ساكت،
و لا اغني حزين !

و يا ألف مرحب..
صاحب الأغنيات

أنا عرفت إن الحياة
في الشوارع
و الكلام في الطريقو العيون اللي تصدق..
جوامع
و الصديق اللي يصدق ..
صديق

والظنون ..
النجوم اللوامع..
       في النشيد البطئ !

فهل مركب القلب راجع..
و لا  راجع غريق !؟

 
و يا صاحب الحب ، مرحب
أنا شربت م العمر ، فاشرب 
و ما لقتش م الشعر مهرب

إليك الزمان

أنا شربت م العمر فاشرب.. 
من الشمعدان 
و ما لقتش م الشعر مهرب..
و من كان لكان

إليك الزمان : مزدجر

أنا شربت م العمر فاشرب..
من الشمعدان ..
الشجر
و ما لقتش م الشعر مهرب..
و من لكان لكان..
                 الحجر

و يااا
ألف مرحب
كلمتين

( طيًّبة و سدَّادَة )

مِجَدَّرين في الاصول ،..
و الرضا ،
و اللطافة

ما اقولش ع الأيام : 
عشوش ولَّادة !

لأنها الأيام
طيور خطَّافة

شوف..
تلتقيها زهور..
جدور مدادة
في البحر!
و النسيان..
       شطوط قطافة ..
شوف ..
تلتقي ال60 سنة .. سجادة
و السيد الإنسان
مصلِّي للصرَّافة !!

شوف مرة تانية عنيه..
شموس عبادة
و انظر ،
تأمل..
تلتقي جرَّافة ! 

و فــ ذمة الله ..
السنين..  أخادة ،
وفـ ذمة الناس
السنين .. غرَّافة !

أنا شفت م الإنسان عجيب بزيادة ..
لكن !
سمعت انه ..
دبح صفصافة !!!! 

و يا صاحب الأغنيات..
إمتى يهدا لي بال في الصور ؟!
و الصور..
ليل
و بحر
و وتر..
و الوتر ع المقام /
                 الضلام !

اللي فيه ..
ناس
و زحمة
و نظر
و اللي فيه الأغاني ..
حرام !!