كريم العراقى يستعرض رحلة 20 عاماً داخل المصرى بعد التتويج بكأس عاصمة مصر

.

.

.
نقدم لكم عبر أقرأ 24 iqraa24.com،

أعرب كريم العراقي قائد فريق الكرة الأول بالنادي المصري، عن سعادته بعد التتويج مع النادي البورسعيدي بلقب كأس عاصمة مصر، وكتب العراقي عبر حسابه الشخصي على فيس بوك: في يوم من الأيام كنت طفلا صغيرا واقف فرحان بتيشيرت النادي المصري، ماكنتش أعرف وقتها إن الرحلة هتبقى طويلة بالشكل ده، ولا إن الحلم هيكبر جوايا سنة بعد سنة، لحد ما يبقى عمري كله متعلق بالمكان ده، 20 سنة كاملة جوه النادي المصري.

أضاف العراقي: أكثر من 10 سنين في قطاع الناشئين، اتربيت فيها على حب الكيان، وعلى إن التيشيرت ده ليه قيمة كبيرة، وإن اللعب للمصري مش مجرد كرة قدم ده شرف ومسئولية وانتماء، وبعدها 10 سنين مع الفريق الأول، عشت فيها كل أنواع المشاعر، فرحة الفوز، ووجع الهزيمة، ضغط المباريات، تعب التمرين، الإصابات، اللحظات الصعبة، واللحظات اللي كانت بتخلينا نتمسك بالحلم أكتر.

كريم العراقي

واختتم: طوال السنين دي كان عندي يقين إن ربنا مش هيضيع تعبنا، وإن الجمهور العظيم ده لازم يفرح يوم ببطولة تليق باسمه وتاريخه، والحمد لله اليوم ده جه، إنك تكون جزء من بطوله في تاريخ النادي المصري، إحساس أكبر من أي كلام، إحساس إن كل لحظة تعب، وكل نقطة عرق، وكل مرة وقعنا فيها وقومنا من جديد كانت ليها قيمة ومعنى علشان نوصل للحظة دي، أنا مش بس لاعب في النادي المصري، أنا واحد من أبناء النادي، ابن المدرجات، وابن الناس اللي كانت عايشة الحلم ومستنية الفرحة من سنين طويلة، وعلشان كده الفرحة دي مختلفة لأنها فرحة مدينة كاملة، وفرحة جمهور عمره ما فقد الأمل رغم كل الظروف، شكراً لكل مدرب علمني حاجة، شكراً لكل زميل شاركني الرحلة، شكراً لكل شخص تعب في النادي، من أصغر عامل لأكبر مسئول، لأن النجاح عمره ما بيكون لشخص واحد، لكن الشكر الأكبر والأهم لجمهور بورسعيد العظيم، الجمهور اللي كان دايمًا السند الحقيقي، في وقت الفرح قبل الحزن، واللي فضل ورا الفريق حتى في أصعب الأوقات، أنتم السبب الحقيقي إننا عمرنا ما استسلمنا، وأنتم تستحقوا اللحظة دي أكتر من أي حد، النهارده وأنا شايل الكأس، افتكرت الطفل الصغير اللي كان واقف يحلم في صورة زمان، وفهمت إن الأحلام لما تكون طالعة من القلب، ومعاها تعب وصبر وإيمان، ربنا بيكرم صاحبها في الوقت المناسب، الحمد لله على نعمة تحقيق الحلم، والحمد لله إني كنت جزء من كتابة لحظة تاريخية للنادي المصري، وإن شاء الله اللي جاي أجمل لأن حكاية المصري عمرها ما بتقف.

المصري يتوج بكأس عاصمة مصر

بعد غياب استمر لنحو 28 عاماً عن منصات التتويج، عاد النادي المصري مجدداً ليحصد لقب بطولة كأس عاصمة مصر، عقب الفوز على إنبي في المباراة النهائية للبطولة بثلاثية نظيفة، ويضيف لقباً جديداً إلى سجلات شرف أبناء المدينة الباسلة.

المصري يحصل على 10 ملايين جنيه

وحصل النادي المصري بطل كأس عاصمة مصر في النسخة الأخيرة، على 10 ملايين جنيه، فيما حصل فريق إنبي صاحب الوصافة على 4 ملايين جنيه، بينما حصل وادي دجلة صاحب المركز الثالث على 2 مليون جنيه، وفريق زد صاحب المركز الرابع على مليون و500 ألف جنيه، وذلك طبقاً لمكافآت البطولة في نسختها الخامسة.

المصري يشارك في السوبر

ضمن فريق الكرة الأول بالنادي المصرى، التواجد بشكل رسمي في بطولة كأس السوبر المحلى في النسخة القادمة، بعد التتويج بكأس عاصمة مصر بعد الفوز على إنبى في نهائي البطولة.

ويشارك فريق المصرى في كأس السوبر المحلى في النسخة المقبلة رفقة الزمالك بطل الدوري الممتاز، وفريق بيراميدز بطل كأس مصر، ويتبقى مقعد وحيد في البطولة والذى يشارك فيه صاحب الكرت الذهبي.

المصري ينضم لقائمة شرف أبطال كأس عاصمة مصر

وأصبح فريق المصرى هو ثالث الأندية التي تتوج بلقب كأس عاصمة مصر، بعد كل من مودرن سبورت وسيراميكا "3 ألقاب"، وكان مودرن سبورت قد توج بالنسخة الأولى عام 2022، قبل أن يفرض سيراميكا هيمنته على البطولة بحصد ألقاب أعوام 2023 و2024 و2025 على التوالي.