كشف الدكتور محمد أبو الغار، رائد تقنية أطفال الأنابيب في مصر، سر الجواب الذي غير تاريخ أطفال الأنابيب في مصر، قائلًا:" بعد نجاح تجارب أطفال الأنابيب في أمريكا وفرنسا وألمانيا، وقال: "بدأ التفكير الجدي لعمل هذه التجربة في مصر، سافرت كوبنهاجن وإنجلترا عشان أتعلم الجزء الإكلينيكي وأتأكد بيتعامل إزاي، فضل المعمل، والمعمل ده جزء مهم جدًا، الموضوع كان صعب قوي". 

وأضاف الدكتور محمد أبو الغار، خلال لقاءه ببرنامج "معكم" الذي تقدمه الإعلامية منى الشاذلي، عبر قناة ON: "صديقي الدكتور محمد شرف قال لي أنا أعرف ناس في أمريكا ممكن يساعدوك، وفعلًا جه مندوب من كاليفورنيا، وكان لهم طلبات كتير جدًا عشان يعملوا المعمل، ووافقنا عليها كلها ما عدا طلب واحد، قالوا مش عاوزين أي حد من المصريين يدخلوا المعمل، فقلنا لهم لازم المصريين يتعلموا يعملوا المعمل ده إزاي".

وتابع: "أنا قاعد في قصر العيني، لقيت سكرتارية القسم جايبالي جواب، فتحته لقيته من الدكتورة رجاء منصور، وكانت نائب عندنا قبل كده واختفت، طلع إنها سافرت أمريكا مع جوزها، وبالصدفة كانوا بيعملوا مركز أطفال أنابيب هناك، فراحت اشتغلت في المعمل 3 سنين".

وأردف: "كانت باعتة الجواب لـ50 دكتور مصري وعربي بتقول إنها عاوزة ترجع مصر أو أي بلد عربية وتعمل مركز أطفال أنابيب، ومفيش ولا واحد رد عليها، أنا بصيت في الجواب لقيته متبهدل بقاله 6 شهور في الأرشيف".

واستكمل: "كلمتها في نفس اليوم، قلت لها أوكي أنا جاي لك، وبعد أسبوعين سافرت أمريكا مخصوص عشان أقابلها وأشوف المعمل، ولقيتها ست عظيمة جدًا وشاطرة جدًا، وقلت لها خلاص تعالي".