ردت الفنانة سماح أنور على سؤال في فقرة "حصل ولا محصلش" خلال لقاءها ببرنامج "معكم" الذي تقدمه الإعلامية منى الشاذلي عبر قناة "on"، ومدى تعرضها للضياع من أهلها عندما كانت صغيرة، قائلة:" كنا بنروح إسكندرية في الصيف، وكان بيتنا في سيدي بشر، وكنت استقل دراجتي وعندي أمل وقتها أوصل للمعمورة، لكن مكنتش أعرف فين المعمورة، مكنش وقتها في تكنولوجيا، وكنت بمشي على طول، وفي كل مرة كنت بتوه ومعرفش أنا فين، وكنت أسأل الناس "أنا عايزة أروح سيدي بشر" مكنتش بعيط أبدًا لأني كنت عارفة إني تايهة مش هموت". 

وكشفت سماح أنور عن موقف تعرضت له وهز ثقتها بنفسها، قائلة: "مرة أحمد زكي الله يرحمه، وكنت قدمت معه فيلم "امرأة واحدة لا تكفي" وفيلم "الليلة الموعودة" ، وكانت تجمعني به صداقة لطيفة خاصة وأنه كان صديقًا للجميع، في مرة وإحنا بنصور "إمرأة واحدة لا تكفي" وكنا في البريك، وكنت بصور أيامها أفلام مقاولات كتير، فقال لي يا سماح أنا عايز أقولك على حاجة، وقالي "إنتي لازم تثقي في نفسك ولازم تعرفي إنك موهوبة، فأنا قلت له "طيب"، قالي لا "مش طيب.. لا زم تعرفي إن فيه ناس كتير في الدنيا، ربنا يعطي لهم حاجة كبيرة جدًا وثقيلة جدًا، لكن هما بيبقوا هايفين فبياخدوها ويقعوا وإنتي من الناس دي!".