عرضت الإعلامية شريهان أبو الحسن، قصة زوج لا يعي ما تمر به زوجته  من أعراض سن اليأس، قائلًا:" أنا زوج عمري 54 سنة، ومش عارف إزاي وصلت للسن ده، لكن الحمد لله صحتي كويسة وحالتي المادية كويسة، ومراتي عندها 51 سنة، عشنا  مع بعض حياة زوجية أقدر أقول إنها سعيدة، تزوجنا من 28 سنة، وأنجبنا 3 أبناء، وأحبهم وأحب مراتي جدًا، هي ست بيت ممتازة وحنونة، وربت أولادنا أحسن تربية، لحد ما تخرجوا من الجامعة.

وبحسب ما جاء في رسالة الزوج، وأضافت الإعلامية شريهان أبو الحسن خلال تقديمها برنامج "ست ستات" المذاع عبر قناة dmc: بيتي دائمًا نظيف ومرتب، وهي ست قنوعة وتحبني وأنا أحبها وأعشقها، لكن مشكلتي أنها أصبحت تعامل نفسها على أنها ست كبيرة، وزنها زاد وجسمها اتغير، ومبقتش مهتمة لا بلبسها ولا بهندامها، ولا بتروح كوافير ولا حتى بتعمل شوبينج زي الستات التانيين، طول الوقت بتشتكي من التعب، ويا إما نائمة أو أنها تشاهد المسلسلات، دائمًا مكتئبة وبتشتكي، ومبقتش بتحب الخروج ولا تتحمس لأي شيء، أصبحت زاهدة في كل شيء.

وتابع:"البيت ماشي زي الفل، مفيش أي حاجة تغيرت، لكن علاقتنا الخاصة تقريبًا شبه مقطوعة، ولما تكلمت معاها قالتلي "روح اتجوز" وردها زعلني، لأني حسيت إني مش فارق معاها، ومبقاش ليا لازمة في حياتها، بقيت بتعصب من أي حاجة وبعلي صوتي، وأنا اللي عمري ما عملت معاها كده، أنا وهي نفس السن تقريبًا، لكن أنا مش حاسس إني عجزت، بل بالعكس، أنا بحس إني لسا في سن الشباب وفي سن العطاء، وعندي في الشغل بشوف ستات من سنها، لكن مش بيتعاملوا على إنهم عجزوا بل بالعكس، مش باين عليهم السن، أنا مش عارف مراتي حصل لها إيه وأنا مش ممكن أتجوز تاني لأني بحبها وبحب بيتنا وحياتنا ولأني مش هقدر أفتح بيتين، ومش شايف إننا كبرنا وعجزنا زي ما هي شايفة... مش عايز نتعامل على إننا شباب، لكن إحنا برضو مش عواجيز للدرجة دي.. هل أنا غلطان؟ وإزاي ممكن أخرجها من الحالة اللي هي فيها دي ؟"