مفيش شروق أو غروب هنا
والكهربا متبرمجة على درجة إضاءة
يادوب تكفي الخلق تصحى من غير غضب
وبتتفصل من نفسها لما تتجاوز معدل الراحة المتاح
غرف النوم توابيت
متزودة بشاشات تعرضلك أحلام حسب المزاج
حلم ناعم للي غرقان في "الحنين"
وحلم ديجتال للى يختار "التمرد"
أحلام مضادة للملل
الحيطان بتميزك من بصمة صوتك
وبتنصحك بنبرة هادية:
"ماتنساش المهدئ
لو محتاج ضبط هوية
دوس1
2 لو محتاج شريك لوحدتك"
3 للدعم النفسي
هناك تحت شباك بيطل ع الفراغ
شاب
مغطّي جسمه بورقة متهربة
مكتوب عليها:
"محتاج لحضن مابيحتاجش كلمة مرور".
مفيش ورود للبيع
والمشاعر بتتأجر ببطاقة متشفرة
والأحضان بتتجرب على نموذج ثلاثي الأبعاد
قبل الموافقة ع الباقات العاطفية:
" علاقة طويلة الأمد
نسخة مؤقتة
عتاب
حذف خاصية الشكوى"
صوت ناعم في مكبرات السوق بيقول:
"الحب للأبد
متاح بضمان محدود ضد الخيانة"
في الزاوية الشرقية
ست بتسأل بياع:
هل في تقسيط؟
يضحك الروبوت ويقول:
"أسف
الأمل نفد من زمن الوباء الرابع"
في شاب مش شبه المشهد
لابس قميص دايب
في إيده دفتر صغير
بيدون كلمات مابتستخدمش في السوق
زي "انتظار"
"صدفة"
"أول لمسة"
في قلب الشارع الشفاف
يافطة صفرا بتلمع:
"أهلا بيك في مركز إعادة التهيئة العاطفية"
مفيش علاج للحزن
الوافدين الجداد في حالة صمت
طقس جماعي للخرس
كل واحد حاضن خوذتة الذكية
المربوطة بأسلاك شفافة
متشبكة في قشرة الدماغ
بتحذف أي شعور صعب تعيش معاه
"من فضلك حدد نوع الذكرى:
حب انتهى
صاحب اختفى
بيت وقع في الحرب
تحب تحذف الرغبات
والا تخفض شدتها"
في الزاوية الخلفية
راجل خمسيني بيبكي بصوت مش متبرمج
بيبوح للجهاز أنه نسي ازاي كانت حبيبته بتضحك
فيرد عليه المعالج الآلي:
"مش مشكلة، ممكن نزويدك ببديل
ضحكة افتراضية تدوم"
في أوضة صغيرة من غير شبابيك
قاعدة بنت بترتجف
سحبت من أحضان الذكرى صورة لولد كانت بتحبه زمان
كان اسمه "نور"
بقى أسمه "بيان تالف"
ومع كل عملية حذف
تصبح المدينة أخف
نظام كبير
وإنسانية أقل.
