سامي مغاوري: «بتجاوز كتير عن إهدار حقي.. لكن صوتي بيعلى أمام أخلاق المهنة»

قال الفنان سامي مغاوري، إنه لا يحب عقد المقارنات بين الوسط الفني الحالي والماضي، رغم ما يحدث حاليا من تجاوزات من القائمين على صناعة الأعمال الفنية لم يحدث مثلها سابقا.

وكتب «مغاوري»، عبر حسابه الرسمي على «فيسبوك»: «حابب أفضفض معاكم شوية أنا واحد من جيل الممثلين السابق من زمن مضى بحلوه ومره.. ومع ذلك ما بحبش أقعد أقارن بين زمننا والزمن دلوقتي، لا أقول شوفوا تمثيلنا من تمثيلكم ولا درامتنا من درامتكوا، لأن كل زمن له جماله وعناصره وظروفه، وبتجاوز في أحيان كتير عن إهدار حقي أو عدم تقديري المادي والمعنوي، وبقول المهم الفن وشغلك والناس اللي بتحبهم وبيحبوك، وعلي سبيل المثال مسلسل حايتعرض وانا من ابطال العمل وبعدين مالاقيش أي تنويه عن وجودي في العمل لا بوست ولا بوستر ولا حتي اسمي في أي خبر، باسكت مضطر وباتمنى النجاح للعمل وبتبقى دى كل أمنياتي، لكن ما يتعلق بأخلاق المهنة ما بسكتش وصوتي بيعلي».

وتابع: «على سبيل المثال لما منتج فني يكلمك في عمل وبعدين المخرج يكلمك ويقول فيك شعر وييجي أوان الاتفاق على الفلوس فتطلب الرقم الغلبان اللي بيزق الحياة معاك، فتلاقى مدير الإنتاج جاتله صدمة فتقعد تتفاوض معاه، ويقولك طيب أنا حارجع للشركة وأرد عليك وتستنى 3 أو 4 أيام وبعدين تلاقي خبر على الفيسبوك بأسماء الأبطال، وفيهم الممثل اللي جابوه مكانك من غير حتى ما حد يكلمك ويعتذر لك حتى إنك مش موجود معانا للأسف، أو خيرها في غيرها، أنا بقى أسمي اللي بيحصل ده إيه؟، حاتعمل إيه لما وشك ييجى في وشي؟!، عموما الأيام بيننا بس في زماننا بقي ما كانش ده ممكن يحصل».